Hmanah chuan

He Article hi Thianpa Zaia'n State Transport Authority Member ka nih lawmpuina (fuihna?) atana a ziah a ni a. Hetianga min duhsak tu thianpa ka nei hi ka lawm em a ka blog update lo tak ah hian ka rawn post a ni.

Hmanah chuan -
An kawt zawlah pher kan phah a. Sikret nen, zozial nen, sahdah nen, kuhva hring nen, guitar hrui nen, kan chhawp nuaih a. KTP ah hla kan hruai thin a. Keyboard nen, drums nen, kan ri bung bung thin a. Chutiang lam thu ringawt chu kan sawi a; a bak hmasawn kan tum lova, kan enghelh lo.

Zan a lo ni a. Computer kan khawih a, ngawi rengin kan thu veng veng a. Internet Dial-up connection hmangin kan chat a, zing dar 4 ah pawh kan la mu ngai lova. He Kolasib-ah hian tuten nge eiru a, tute hi nge khawtlang hmasawnna tak tak ngaihtuah tih lam kan buaipui lo. Washington leh New York te, London leh Paris lamahte kan mit kan len a; chu'ng khawpuia thil thlengte chu kan thenawma pitar hritlang te, naute nei thar te, kawm chhak pa pakhat ram kal a haw tlai thute aiin kan hre rang zawk a. Kolasib-a DC Office sak zawh a nih tak thute ai pawhin George Bush-a'n Afghanistan-a sipai a tirh luh leh zatte chu kan hre chiang zawk thin. Kan chaw ei a tui loh phah chuang lo.

Naupan laia kan khelh thin 'Monopoly' chu Internet atangin computer-a khelh theihin kan la a. Kan va men rei pui thei tak e aw! Kan nui nasa lutuk thin kha a hahthlak lai ber a ni a. Current a rawn tawp thut a, kan inchawi Sikret-te kha.. tuma khawih lohvin a lo bo ringawt thin a nih kha!!

Hun a lo kal zel a -
Ram hmangaihna rilru kan nei tial tial a. Ho taka nun ringawt chuan khawtlang a siamtha lova, chhungkua a chawm hek lo. Ram hmangaihna chuan min hneh tial tial a; khawtlang leh ram tana inhman duhna a lian chho va, politics-te pawh a ti awm mi chuan kan luhchilh ta a, kan luhchilh mek zel ta a ni.

Tichuan -
Sorkar thar a lo ding a. Keini thian zaho hian keimahni theihna leh thiamna kawng kawngah chuan he sorkar thar a din theih nan hian kan tha chu kan thawh ve tih hi kan sawi ngam a, kan sawi zak bawk lovang.

Chu sorkar tharah chuan nihna duh vanga zuanglut an awm a, mahse Kolasib dot com-a kan hotupa hi chutiang a ni lo tih hi a hretute kan ni. Ram rawngbawl tur erawh chuan nihna neih a ngai a, 'engmah lo' (nobody) tan eng a tih theih loh va. Chutichuan, a kal zel a, kan Admin chu Mizoram State Transport Authority-a Non-Official member 4 zinga PAKHAT a ni ve ta chat mai!

Kan thianpa hi kan chhuang a, a nih ang ni thei hi Kolasib tuiliak zingah hian an lo awm tawh maithei a, mahse keini chuan kan hre chiah lo. An lo awm a nih pawhin kan thianho zingah hian an la awm ngai lova, an awm leh tawh kher lo maithei. Kan lawmpui a, kan chhuang tih hi tun lo pawh kan la sawi nawn leh mahna.. District huap mai ni lo, State huap-a member tlem te thlan zinga a tel hi chhuanawm a tling lo thei lo.

STA a kan thianpa a tel avang hian a thiante hian driving license te, taxi leh auto permit te neihna remchang atana hman kan tum lova. Motor kan nei zo va, kan mamawh a nih chuan, kan thianpa a tel avanga dan bawhchhe zawnga chet kan tum chuang lova, kan kawnga ani a lo awm a, amah avanga awlsamna kan hmu a nih chuan kan vannei-ah kan inngai mai ang. Amah avang hian kan chapo phah lova, ani pawh chapo turin kan duh lova, a chapo lovang tih hi kan ring ngam chiang bawk.

Kan thianpa hian tha takin a hna thawk sela, he Zoram tan hian a thiamna leh finnate hi tangkai takin hmang se tih hi kan duhpui a. Chumi atana kan tih theih a awm a nih chuan eng lai pawhin puih kan inhuam reng anga, kan pui bawk ang.

Mi tam tak chuan hetianga kan thianpa Mizoram pum huapa member a nih tak avang hian a theihna kawng kawngah a thiante hian, a dik vak lo deuh a nih pawhin chhawr kan tum turah in lo ngai a ni maithei. Chutiang a nih chuan in tisual ang. Chutiang chu kan tum lova, kan tum ngai lovang.

Hei erawh lo hre ve rawh u - he ram, Mizoram hi kan ram a ni a, kan theihna zawng zawng hi Mizote tana hman tur niah kan ngai a. Chu Zoram tana thawk tura kan penna kawngah chuan hetianga kan hotupain nihna sang tak mai a'n chelh ta hian 'Hma Kan Sawn Zel' tih min hrilh a, min hriattir a. Hmasawn zel turin theihna pawh kan nei tih min hrilh a, min tichak a, phurna min pe a ni. Hma kan sawm zel a, kan sawn zel dawn e..

Congratulation to Tawia, Member, STA, Mizoram.